政Whats噏:小麗未決定撤上訴 泛民已爭餐懵

作者:STELLA    發表日期:2018-04-16 05:40:05

社民連梁國雄(長毛)同自決派劉小麗(小麗),因宣誓玩嘢喺舊年被取消立法會議員資格(DQ),2人嘅上訴案已排期明年4月審訊,如按程序或要拖到2020都未有得搞補選。近日盛傳小麗會撤上訴以求盡早進行補選,但佢話其實乜嘢都未諗,仲等緊長毛回覆要唔要一齊撤銷上訴,據知就算撤上訴,政府都要等到明年先會擇日補選。姑勿論幾時選抑或選幾多個席位,泛民已認定小麗再參選亦會被DQ,唔少人已吼實九龍西一席唔放,即係補選未搞,泛民已就小麗嘅Plan B爭餐懵。

下一輪補選或只處理小麗喺九龍西嘅席位,而上月中舉行由DQ風波引起嘅首輪補選,香港眾志執委周庭因黨章寫明「民主自決」被DQ參選港島區補選嘅資格,因此政圈界均相信小麗再次參選亦同樣會被DQ。但有泛民中人估計,小麗背負「DQ光環」,兼要準備派員出戰2019年區議會選舉,下輪補選係必須出戰,並因而可對其Plan B人選有欽點權。但上次初選出現「屈基(馮檢基)」事件,民主派要另覓人選非易事,小麗亦難搵一個啱心水兼能服眾嘅人代戰。

自首輪補選落幕,一直有聲音要求長毛同小麗撤銷上訴,爭取盡快啟動第二次補選。但小麗就話,其實乜嘢都未開始諗,仍要等長毛回覆要唔要一齊撤上訴。至於最新傳出民協楊彧係小麗Plan B,小麗笑咗一聲:「我都未見過佢」,認為目前講Plan B係言之過早。佢又認為姚松炎喺上輪補選落敗,對民主派已響起警號,指出大家整合程度不足,大家唔知對方做緊乜?

但民主派已蓄勢待發備戰補選,相信「屈基」後馮檢基暫不會再參選,其徒弟民協何啟明則蠢蠢欲動;公民黨區議員余德寶近日頻現身,可能都想爭曝光備戰換屆;舊年退出工黨嘅胡穗珊加入「社區前進」同小麗雖然睇嚟行得好埋,但只稱喺隨時準備參選;民主黨「乳鴿」袁海文喺初選一戰後名氣略增,惜黨內仍有暗湧,係咪再戰亦有待商榷。

有政界人士話上述人選各有支持者,但係冇一個人「星味」夠濃,可擔起「民主派代表」出戰同建制派「隻揪隻」,似乎下一輪補選前,民主派勢必又混戰連場,睇嚇邊個可以笑到最後,正式參選。


本文來源:http://hk.on.cc/hk/bkn/cnt/news/20180416/bkn-20180416000553229-0416_00822_001.html