賓利Mulliner 神級工藝

作者:SHELLEY    發表日期:2017-06-18 13:03:02

賓利(Bentley)的Mulliner,堪稱車壇最頂級的汽車客製化部門,在Mulliner工作室,不論客人的想法有幾天馬行空、對內飾的要求幾刁鑽,所有嘢都變得有可能。早排到訪Mulliner的大本營,難得見到一部為中東市場特別炮製的Mulsanne Grand Limousine,部車加長至6.5米、仲有6座位。心諗,仲有咩係唔得?

這部特製Mulsanne較標準版長一大截,後排不僅設有4座位,就連車窗及分隔玻璃都可隨時變成不透明,啱晒鍾意私隱度高的老闆。為凸顯與別不同的身份,除了車頭廠徽加上「Coachbuilt by Mulliner」字樣外,21吋輪圈的廠徽更用上永不倒轉的設計。部車賣幾錢?廠方就冇透露,據聞稅前身價高達100萬英鎊!

事實上,用「神乎其技」來形容Mulliner的工藝一啲都冇誇張,工匠竟可利用木材的切片拼貼出風景畫,就如這塊以西班牙Roque Bentayga為背景的飾板作例,木飾上的連綿山脈便用上32塊取材自6種不同樹木的切片製作而成,係咪好佩服呢?當然,你仲可以自定座椅、軚盤的顏色及花紋,甚至喺上面繡上自己鍾愛的圖案。有需要的話,甚至可以喺車廂加個香檳櫃,或者用車廂相同的皮革製造兒童安全座椅,幾乎你諗得出,Mulliner都做得到。


本文來源:http://hk.on.cc/hk/bkn/cnt/lifestyle/20170618/bkn-20170618120016933-0618_00982_001.html