歐聯 古天奴準備搏殺!西維爾係高普剋星

作者:Eleanor    發表日期:2017-09-14 03:22:01

即上英超刨績王:http://win.on.cc/epl 

利物浦重返歐聯分組賽,今晚深夜將於晏菲路主場迎戰西維爾,最大焦點就係菲臘比古天奴會否披甲。自從發生轉會巴塞風波後,古天奴仲未為紅軍上過陣,但紅軍企硬留住呢位巴西國腳後,佢已經復操一段時間,領隊高普表示,古天奴依家已經傷愈並好弗,相信勁大機會落場,甚至正選上陣。

古天奴近日復操,同隊友有講有笑,表面睇心情唔錯。早前高普已經話,古天奴近日於紅軍操練場中,表現及態度同之前完全一樣;而古天奴目前非常健康而且狀態良好,雖然冇肯定佢會落場,但相信呢名好波之人,將會今季首度同主場球迷見面。另外,前鋒穆罕默德沙拿,近日有病在身,有傳將會缺陣,不過英媒影到佢於當地時間今午返到球會集合,精神面貌唔錯,相信亦可為紅軍落場搏殺。此外,有傳德國門將卡利奧斯,會代替米洛列特正選披甲。

紅軍回到歐聯,今次於分組賽第一擊,就對住小組最大對手西維爾,球會上下唔敢掉以輕心,特別係過往利物浦主場出戰西班牙球隊嘅往績只屬麻麻。於歐戰史上,紅軍共17次對西班牙球隊,戰績只為6勝7和5負,勝率僅得35%。

高普於執教生涯中,雖然近5次於主場均殺敗西班牙球隊,不過西維爾就係佢嘅剋星。帶領緬恩斯及多蒙特時,前者曾於主場0:2不敵西維爾,後者亦輸過0:1;而呢名德國名帥,近5次帶隊西維爾一次都未贏過,當中包括16年歐霸盃決賽,紅軍反輸1:3。此外,高普帶隊面對西班牙球隊,總勝率只得33%,今場紅軍要贏西維爾唔易。

東網體育同你追實體壇每個精彩時刻! 
http://bit.ly/2ecTF2A 


本文來源:http://hk.on.cc/hk/bkn/cnt/sport/20170913/bkn-20170913213944911-0913_00882_001.html