香港網賽 禾琪親手派飯 老友記「甜」入心

作者:Cloris    發表日期:2017-10-10 03:00:01

「丹麥甜心」禾絲妮雅琪炮製愛心飯盒,「老友記」食完甜到入心!保誠香港網球公開賽2017今日正式開波,一班靚女球星今日未有比賽,大會特別安排佢哋行入社區,實行更融入香港呢個城市。打頭陣嘅梗係喺香港超受歡迎嘅「禾琪」喇!

今日禾絲妮雅琪就黎到深水埗惜食堂,幫手派飯畀一班老人家,身為網壇巨星,佢仲拎起飯盒自己落手落腳裝飯,果然有愛心嘅女人真係靚女啲!一班「老友記」聽到有世界級球員派飯都拍爛手掌。「今次係我第一次喺香港出席社區活動,聽講佢哋每日都派好多飯出去,真係好感動。」禾琪仲搞笑咁話自己平日會焗吓甜品,但就唔係好出色嘅廚師。

身為上年香港網賽冠軍,「禾琪」就好有信心今年可以衞冕成功:「今季我嘅表現唔錯,希望可以保持一個好狀態喺香港比賽,同時享受喺呢度嘅時間。」禾絲妮雅琪曾經喺2010年登上世界一姐嘅位置,被問到是否想再登頂,佢就咁答:「成為世界冠軍係好特別嘅經歷,但我目前首先要專注嘅係香港網賽同埋新加坡年終賽,如果有機會再做一姐,我會當佢係一個額外獎勵。」

東網體育同你追實體壇每個精彩時刻!
http://bit.ly/2ecTF2A 


本文来源:http://hk.on.cc/hk/bkn/cnt/sport/20171009/bkn-20171009142135502-1009_00882_001.html