大橋工程頻攞命 官僚塞責誤蒼生

作者:Angle    發表日期:2017-04-03 09:43:31
港珠澳大橋香港段工程一波三折,唔單止甩漏多多,嚴重滯後,隨時拖住珠海澳門後腿,而且短短六年就奪去十位工友性命,堂堂國家級工程淪為「血淚大橋」,簡直佗衰家!
好似最新一單慘劇咁,一個位於橋躉嘅工作台拆卸時繩纜突然斷開,導致兩死三傷,有資深工程師睇番事發片段,形容連繫工作台嘅工字鐵好似細路仔砌積木咁兒戲,自己做咁多年工程都未見過,想唔出事都難。
正如管理學著名嘅「梅菲定律」,凡係可以出錯嘅環節都會出錯。據工會人士講,涉事工程位置偏遠及位處海上,加上聘請唔少南亞裔工人,增加溝通同指揮困難,本身風險已經比較高;而承建商指引亦好有問題,如果當時工人將安全繩連繫橋身而唔係工作台,咁工作台墮海時就唔會無法逃生,安全扣亦唔會淪為「死亡扣」。
好明顯,工程出現咁多安全隱患竟然仲可以照常開工,唔使問阿貴,路政署、勞工處等相關部門平時肯定疏於監管,承建商見無乜機會「斷正」,咪繼續開行turbo囉。有人就講得啱嘞,家陣港珠澳大橋主橋工程已經完工,無論政府抑或承建商都承受好大「死線」壓力,特別係承建商,一邊係合約到期未完工,一日可能麵對數以千萬元計罰款,另一邊係學似工會人士話事偈,法庭對工程安全事故傾向輕判,好多時「幾萬元一條人命」,唔排除有人為趕死線不惜犧牲工程質量甚至工人安全。
對於今次慘劇,勞工及福利局例牌菜又係大耍官腔,話會加強監管同巡查;至於係咪趕工肇禍,勞福局高官將個波大腳傳畀路政署,話要等埋對方調查報告喎。不過大家有眼見,港府為咗令大橋如期通車,不斷將工程時間表壓縮,以致逾千名工人每周平均要加班工作四粒鐘,期間勞工處發出四百三十九日「停工令」,點知之後就拍拍籮柚,關人個關,結果工傷問題咪係喺停工同趕工嘅惡性循環下,進一步惡化囉。
話時話,香港呢一、兩年進入大型基建施工高峰期,大量工程逼埋一齊趕工,類似港珠澳大橋嘅奪命意外可能仲會陸續有來。最令人擔心嘅係,工程趕頭趕命,將貨就價,工人生命安全無保障唔在講,容乜易搞出一個又一個豆腐渣工程o架!
始終都係嗰句,針拮到肉先至知痛。有人建議勞工處派員落地盤取代僱主自行聘請嘅安全主任,計功夫茶話齋,如果班高官身先士卒同工人一齊落手落腳做嘢,佢哋自然打醒十二分精神,工人自然可以開開心心上班去,平平安安回家來!
原文地址:http://orientaldaily.on.cc/cnt/news/20170403/00190_001.html