一橋兩製拖後腿 香港速度佗衰家

作者:SARAH    發表日期:2017-04-11 09:41:45
「一國兩製」聽得多,「一橋兩製」大家又聽過未?冇錯嘞,港珠澳大橋內地同澳門段進展順利,唯獨香港段慢過蝸牛一味拖後腿,完工無期,分分鐘「等埋香港」收場。一條大橋,兩種速度,呢啲咪「一橋兩製」嘅特色囉!
啱啱之嘛,位於拱北口岸地下嘅拱北隧道舉行全隧貫通儀式,意味全長十三點四公裏嘅珠海連接線主體工程,如期今年十二月實現通車高唱入雲。好嘞,內地同澳門段順風順水,咁香港呢邊情況又點呢?
講出嚟都羞家,香港段工程一波三折,甩漏多過食飯,超支勁過人,連工業意外傷亡人數都多過人,以致通車日期一延再延,按照依家嘅進度,今年年底通車睇怕都係凍過水,堂堂國家級基建工程隨時淪為國際笑話,你話係咪佗衰家吖。仲有吖,即使大橋主體順利通車,作為配套工程嘅屯門至赤鱲角連接路至今十畫未有一撇,咁即係點?即係成條大橋等於廢咗武功囉。
以前香港好多人嫌內地貧窮落後,到依家強國土豪荷包腫脹,又改口話香港製度先進,「香港製造」比「中國製造」品質優良。依家大家睇到啦,同一條大橋,香港呢邊進度大落後,由最開頭受到司法覆核挑戰,到工程撥款喺立法會內被無良政客拉布狙擊,好大程度就係因為「製度」掣肘。
至於工程質量咯喎,就更加係黃腫腳不消提,大橋香港段施工六年多以來意外頻生,已經奪去十位工人性命,「血淚大橋」臭名昭著。淨係工程違規被當局要求暫時停工就超過六百日,「香港製造」有幾高質素,心照喇。
一滴水睇穿整個世界,一條橋亦見證香港同內地競爭力嘅消長。以前「香港速度」作為高效率嘅代名詞,一早就被「中國速度」所取代。好似內地最近拍板興建河北雄安新區,承擔北京部分非首都功能,唔少人就估計以內地當局嘅行政效率,十零年內有望成事,以新區二千平方公裏嘅發展規模計算,差不多等於兩個香港,都咪話唔得人驚。
唔怕貨比貨,最怕唔識貨,當中國喺南海造島嘅速度,連美國佬都嚇一跳嘅同時,香港起一個人工沙灘幾年都未見影,兩者根本唔喺同一個層次。魯迅講過,中國改革難過登天,連搬張枱裝個火爐都要流血,形容今時今日香港可能更加貼切。
講起真係可悲,當年鄧伯伯提出「一國兩製」,香港五十年不變,好多人幻想最終會變成「一國良製」,內地跟香港嗰套走,家陣實踐證明,兩製優劣立見,掉番轉頭就差唔多!
原文地址:http://orientaldaily.on.cc/cnt/news/20170411/00190_001.html